Betong deka disikap ngena pampang kampus universiti

BETONG: Pampang kampus sebengkah universiti deka digaga enda lama agi ba pelilih Betong.
Sapit Kepala Menteri Datuk Patinggi Tan Sri Alfred Jabu anak Numpang madahka iya merambu deka numbuhka siti pampang kampus universiti ba Betong jemah ila.
“Sebedau aku ngetu ari pengawa politik, aku deka meda siti pampang kampus universiti dipejadika ila,” ku iya.
Iya mantaika pengeran ati tu lebuh bejaku ba pengawa Nyuaka Geran Projek Mit Menua Pesisir (MRP) ngagai penerima ba pelilih Betong ke diatur ba Rumah Rehat Perintah Betong, ditu kemari.
Nyerumba pengawa nya Jabu nyuaka geran MRP ke bisi RM738,600 ungkup 42 iti gerempung, JKKK sereta tadika pelilih Betong.
Taja pia, Jabu nadai madah nyemetak pampang ni ke deka ditumbuhka ba Betong ila.
Kenyau iya nyadi pengari rayat ari taun 1975 suba, bisi enam buah sekula sekondari nyengkaum sebuah Maktab Sains MARA udah bediri kena ngemansangka pelajar ba Betong enti dibandingka semina dua buah aja sebedau nya.
Standard perengka pelajar ba Betong mega deka dikemanah enti projek ngaga metro politeknik dikemendarka ila.
“Raban ari Menteri Pelajar Tinggi deka ke Betong seharitu (hari Tiga) sereta mai berita manah nya,” ku iya.
Berindik ari nya mega, Jabu ke mega Menteri Pemansang Menua Pesisir sereta Menteri Ngemodenka Pemansang Betanam Betupi ngarapka pemujur pelajar dia ila nguntungka rayat ba menua tu kelebih agi pelilih Betong.
Bela bisi ngulu pengerami nya Residen Pelilih Betong, Datu Romie Sigan Daniel, Sekretari Politik Kepala Menteri Isik Utau, Ketuai Opis Tanah enggau Survei Betong, Peggy Ronin sereta pemesai perintah ke bukai.

Posted in: isu semasa di betong