Nengah nya mega mayuh orang teparuk ngereja penyalah ketegal dibai ati gagit
KUCHING: Laman web pengawa rama perengkaguna ke manah endur berandau enggau pangan, diri sebilik, tauka ngiga penemu, tang enti enda betatika sapa ke enggau bepangan, tau ngerusak pengidup diri.
Bedau lama tu tadi, seiku Indu Iban ari RPI Rumah Jarraw Bukong, Pelasok kena pegai pelilih Betong ke dikearap apai indai belajar ngambi kus nyadi misi (SEGi College, Damansara), enda mukai-mukai kena akal pangan lelaki iya (bansa Afrika ke dikelala enggau nama Chimezie Michael) ke dikelala nengah laman sosial Facebook (FB) ke besemaya mayuh macham pengaya ke ulih diberi ngagai indu nya, tang enda nemu diri dikena lelaki nya mai masuk dadah ngagai menua China, lalu diatu agi benung ditan polis enggau immigresen ba Padang Bilun Guangzhou, China.
Sapit Menteri Luar (MOFA) Datuk Richard Riot lebuh bechairmanka aum media pasal kes tu ngelalau indu biak kelebih agi sida ke belajar ba institusi pelajar tinggi (IPT) nyengkaum indai tunggal betati lebuh bekelala enggau orang ari menua luar ba FB tauka ba laman sosial web bukai.
“Tu kedua kali kurang ari 6 bulan, 2 iku rayat kitai (kededua indu Iban) kena akal laban ‘pangan lelaki’ sida ke ngujungka sida kena tangkap lebuh datai ba menua orang, laban enda sedar diri empu ke dikena orang mai dadah masuk ngagai menua nya.
“FB tu endang manah tang betati meh lebuh bekelala enggau orang ke enda dikelala kita, kelebih agi orang ari menua Afrika,” ku iya maya aum media ba opis MOFA ba Jalai Simpang Tiga ditu, kemari.
Riot ti mega Kaban Parlimen Serian madahka, nembiak indu ari Betong nya, Marylyne Sandra Sapat, 22 taun kena tangkap ba Padang Bilun Guangzhou/Shenzhen kena 11 Mac lalu ripot dianjung ngagai Wisma Putra (alai opis Menteri Menua Luar) ulih Opis Konsul Jeneral Malaysia menua nya datai ba opis menteri kena 29 Mac.
“Indu nya ditemu mai dadah masuk ngagai Guangzhou/Shenzhen enggau chara nelan 100 igi pil dadah bansa ‘Heroine’ ke digaga iya empu enggau chara ‘sukarela’ tang diasuh pangan lelaki iya ke dikelala ba FB.
“Datai ba padang bilun nya, pampang Narkotik tetemuka indu nya napuk pil heroine enggau chara nelan pil nya. Dipelaba pemerat pil heroine nya urung entara 600-700 gram,” ku iya.
Nitihka ripot ku Riot, indu nya dibayar RM5,000 nyadi upah iya mai tama pil heroine nya.
Ku iya, Malaysia nadai bekompromi enggau penyalah mai dadah masuk ngagai menua tu tauka mai dadah keluar nengah menu tu.
“Zero tolerance, Pemerat 1 kilogram ngujungka orang ke ngaga penyalah deka napi ukum sampai mati,” ku iya.
Enti nitih ba taun 2010, diperatika bisi pengurang ba pengawa salah mai dadah tama ngagai menua orang nengah menua tu, tang bedau lama masuk ngagai taun 2011, diperatika pengawa salah baka tu majak nambah taja pan bedau apus bulan April 2011.
“Ba menua China, bulan September 2010, Opis Embassy Malaysia ngeripot 75 iku rayat Malaysia kena tan tauka kena tangkap ketegal penyalah mai dadah tama ngagai menua nya.
“Taun 2008, 115 iku kena tangkap, 2009 119. Tang naka ke diatu bisi nambah (Mac 2011), iya nya 11 iku kena tan tauka kena tangkap (ba Guangzhou) ke nyengkaum Marylyne. Ari 11 iku, 9 indu sereta 2 iku lelaki,” ku iya.
Bekaul enggau pengawa salah mai dadah tama ngagai menua luar ke digaga rayat Malaysia, ari taun 1991 dalam kandang 20 taun (datai ba 2010), urung 833 iku rayat Malaysia kena tangkap lalu ditan tauka kena jil ba sekeda rumah jil serata dunya.
“Pengabis mayuh kena jil tauka kena tan, ba menua Thailand 272, Singapore 164, Taiwan 125, enggau ba China 82. Tu utai ke ngirauka ati kitai meda penyampau majak mayuh,” ku iya.
Ku Riot baru, MOFA nitihka atur ‘Vienna Convention’ ke meri atur ba perintah menua nitihka atur tu, enda tau masuk champur ba ukum ke diletak ba siti-siti menua.
“Opis Menteri semina ulih ngemataka proses ukum, lalu beratika pengelantang pendiau seseiku orang ke ngereja salah diintu enggau manah,” ku iya.
Kes baka tu kedua iya nyadi ba indu Iban. Keterubah ba taun 2010, siku indu Iban asal ari Sri Aman, Christina Luke Niju, urung 20 lebih taun (tang diatu sida sebilik udah bepindah ke Sabah) kena tangkap ba Padang Bilun Meilan nengah modus operandi ke sebaka, semina pemerat dadah ke dibai iya masuk ngagai menua China urung 1.3 kilogram ke tau ngujungka iya kena ukum mati (nitihka proceeding kut).
Ari semua penyalah baka tu ke nyadi ba menua luar, tanya orang mayuh, kebuah opis bekuasa ba padang bilun menua tu enda tetagangka pengawa salah baka tu ngelebus pansut ari menua tu.
“Amat iya penerebai terus ari Kuala Lumpur. Bisi perambu ‘malawakil’ (wakil Malaysia ba menua luar) ba Guangzhou ngirum surat meri perambu ngagai perintah minta kerejasama opis bekuasa (Kastam enggau Imigresen tauka polis) mansik tiap pintu masuk-keluar semua padang bilun menua tu,” ku iya.
0 comments:
Post a Comment