Mensia ba Pelilih Betong ngasaika pemansang

NAMA PEMADAH TU?: Claire John (kiba) enggau Evelyn Burai ari Rh Gumbang, Sg Pelandok, Paku, Bukit Saban.

BETONG: Mensia mayuh ke diau ba sitak Betong bejalaika pengawa sida iya baka selama taja pan ‘mood’ pengawa bepilih diatu makin semak ditambahka enggau pengawa nganjung sereta ngantung nama parti politik ke deka bediri belabuh pagila (saritu).

Sekeda mensia ke dikerandau ba Pasar Betong enti enda madahka enda nemu pengawa orang ke deka bepilih tauka enda berapa ka meri timbal sida iya ba pengawa bepilih semadi ditanya pasal pemansang kedeka sida enti sema parti Barisan Nasional (BN) menang ba sitak nya.

Seiku orang ke bisi ditemu lebuh benung ngirup ba kedai kopi enggau bala bakeh iya, beumur 64 taun ari Lubau, Ulu Layar, taja pan enggai nama iya disebut ditu, madahka rayat Betong tetap nyukung pengari BN-PBB.

“Kami ditu tetap nyukung iya. Mayuh endar pemansang ke udah digaga iya ba Betong,” ku iya ke kala gawa ba opis kunsil ba Betong, Engkilili, Sibu enggau Saratok lalu madahka diri deka enggau sama nyukung penyandang Layar maya nganjung nama pagila (saritu). Ba Frida anak Anggang, urung 30 taun ari Rumah Ketit, Nanga Ban madahka peminta sida ba rumah panjai ba sitak nya minta perintah ngaga sekula besemak ba rumah panjai dia lalu minta pemansang ditikika ai ngagai rumah panjai

sida ke endang lama udah dianti sida iya.

“Baka ke diatu bala nembiak kami dianjung besekula ngagai St Augustine ba Pasar Betong ke pama diri penyauh.

“Taja pan enda mayuh bala nembiak sekula sida ke diau ba buding laban enda semua nembiak sekula ulih diterima diau ba buding laban udah kelalu mayuh, sekula enggai nerima laban nadai agi endur,” ku iya madah lebuh dikerandau ulih Utusan Borneo ditu, kemari.

Tambang kena nganjung anak nurun ke sekula ba St Augustine enti dalam sebulan ku Frida, datai ba penyampau RM100, nitihka gaya orang ngambi bala anak rumah panjai nya nurun ke sekula tauka maya pulai ari sekula.

“Balat endar ungkus nya. Nya alai peminta kami ngasuh perintah ngaga sebuah sekula besemak enggau rumah panjai kami.

“Enti baka ba Tanjung Asam, nyau jauh mega enti kitu, kadang nyauka RM100 tambang sebulan ari Tanjung Asam kitu (pasar Betong).

Penyauh ari tu ngagai Ulu Skrang bisi. “Ni nemu enti nadai utai kena nyau ngena perau, nyau 2 kali tambang,” ku iya.

Taja pan udah bisi jalai alun nuju rumah panjai sida iya, tang sida iya udah lama napi penanggul nadai ai.

“Nya meh orang ke jauh ke ulu, kami din udah bisi jalai. “Api udah bisi, ai ke nadai, berapa taun tu ke udah. Suba bisi bala YB madahka deka nikika ai, tang lalu bedau.

“Kami dia ai nya ke merinsaka kami, ngarapka ke ujan aja.

“Enti kemarau balat agi, mandi ngagai sungai, nya pan enti sungai nya manah, sawit ke jai semua buai kia magang.

“Nya meh enti suba diirup ai nya, diatu nadai ulih diirup agi.

“Ngarapka ba pasar, segelen ke tinggi RM5 enti ngasuh orang mai bedau enggau tambang agi. “Nya meh sida mayuh sebanaka ai ukai semina maya kitai bisi pengawa laban kitai besesehari begunaka ai, nya tusah endar,” ku iya ke bedagang nyual lita ba pasar Tamu Betong.

Urie anak Sadar, 39 taun ari Rumah Panjai Stambak Ulu sama napi penanggul besebanaka pengurang ai ba rumah panjai nya.

“Nya pengarap aku, barang sapa ke menang ulih mantu, ngambika genturung rumah panjai kami bisi ditikika ai kelimpah ari aku empu minta bantu kelebih agi baka kami ke nyadi indai tunggal,” ku iya ke bisi 5 iku anak.

Ku Urie naka kediatu bansa bantu ke diberi ngagai iya semina mantu bala anak iya nurun sekula.

“Bala anak aku bisi sekeda agi mit, sekeda nya udah besai, kira ditanggung aku.

“Baka tu bejual ba tamu nitihka gaya pemuntang ngambi barang, baka reti baka kami ba Betong tu ka ngambi barang kelalu mar, enti ngambi borong.

“Mija alai bejual tu, suwa nya asaika berat, amat suwa nya munyi mit bayar, tang kami berunding bayar pulai mansang minyak kena kami bejalai,” ku iya ke bisi enggau minta bantu e-kasih lalu enti ulih ku iya bantu e-kasih nya ditambah agi penyampau.

Abang Dalhan Abang Yaman, 69, ari Kampung Melayu Betong madah pemansang infrastruktur ngaga bank patut diperundingka. “Amat Pasar Betong tu udah mayuh pemansang.

Tang bisi mega pengurang ba perengka guna baka bank. “Ke diatu kami semina bisi Hong Leong Bank, Bank Simpanan Nasional (BSN) enggau Pos Opis aja.

“Enti diperatika kelebih ba ujung bulan, nuan meda orang mayuh ke berintai ari dalam Pos Opis nya datai ba luar, kadang-kadang bejam nganti, tang enti nuan tama ngagai palan tu nya semina siti kaunter aja ke buka,” ku iya.

Ukai deka nganu sapa-sapa ku Abang Dalhan, tang gaya baka tu ngirauka hati. “Gaya tu ngenusahka orang mayuh kelebih agi sida ke datai ari menua ulu. “Kadang-kadang sida tu nganti sehari-hari ba Pasar Betong.

“Nya pekara ke patut digaga manah agi..Utai bukai nyangka nadai sebarang timbal aku.

Semina aku madah pemansang ba Betong tu diatu majak mayuh, nya utai ke manah,” ku iya ke kala gawa ba Opis Kuching Port Authority.

Posted in: isu semasa di betong